Sot do jetë një ditë ndryshe në Tiranë, të gjithë me sytë nga qielli

Skuadrilja Akrobatike e Forcave Ajrore Mbretërore Britanike do të zbukurojë sot qiellin e Tiranës. Një lajm të tillë e ka dhënë vetë ministrja e Mbrojtjes, Mimi Kodheli, e cila ka thënë se epiqendra do të jetë Bulevardi “Dëshmorët e Kombit”. “Nesër nuk do të jetë një ditë aq edhe e zakonshme për banorët e kryeqytetit. Me 50 vjet eksperiencë dhe mbi 4500 shfaqje në 55 vende të botës, Skuadrilja Akrobatike e Forcave Ajrore Mbretërore Britanike nesër do të fluturojnë në qiellin e Tiranës. Epiqendra do të jetë Bulevardi Dëshmorët e Kombit", shkruan ajo. Por, një pjesë e mirë e ndjekësve të saj online nuk e kanë pritur mirë, pasi kërkojnë që edhe Shqipëria të ketë flotën e saj ajrore. “Pse duhet të fluturojë bota mbi hapësirën tonë ajrore?”, ishte një ndër komentet.