Dekriminalizmi, Llalla ngre strukturën për hetimin e zyrtarëve të lartë

Kryeprokurori Adriatik Llalla ka firmosur krijimin e strukturës së posaçme që do merret me hetimin e zyrtarëve të lartë, në kuadër të ligjit për dekriminalizmin.

Struktura në fjalë do të merret me verifikimin e integritetit të zyrtarëve publikë, në zbatim të ligjit të njohur ndryshe edhe si ligji “Për dekriminalizimin…”.

“Ligji ‘Për garantimin e integritetit të personave që zgjidhen, emërohen ose ushtrojnë funksione publike’ dhe Kreu VII i Vendimit të Kuvendit të Republikës së Shqipërisë nr. 17 datë 04.03.2016 ‘Për përcaktimin e rregullave të detajuara mbi zbatimin e ndalimeve të parashikuara në ligjin nr.138/2015…’, përcakton organin e akuzës si institucioni përgjegjës për verifikimin e integritetit të zyrtarëve në të gjithë administratën publike”,­ thuhet ne deklaratën për shtyp të Prokurorisë së Përgjithshme.

Burime zyrtare nga prokuroria bëjnë të ditur se “bazuar në aktet ligjore të mësipërme, Prokurori i Përgjithshëm urdhëron krijimin e Sektorit të Verifikimit të Integritetit të Personave që Zgjidhen, Emërohen ose Ushtrojnë Funksione Publike, i cili do të përbëhet nga 2 prokurorë, 3 oficerë të Policisë Gjyqësore dhe një specialist i Teknologjisë së Informacionit”.

Po ashtu, Prokurori i Përgjithshëm urdhëron edhe;
– Krijimin e regjistrit për regjistrimin e kërkesave për verifikim dhe krijimin e regjistrit për regjistrimin e formularëve të vetëdeklarimit; si edhe,
– Krijimin e një sistemi elektronik për regjistrimin, ruajtjen dhe dokumentimin e kërkesave për verifikim, të dhënave, akteve apo fakteve të administruara, rezultatet e verifikimit dhe të dhënave të grumbulluara.

Në urdhrin e Prokurorit të Përgjithshëm përcaktohen edhe detyrimet e punonjësve që do të jenë pjesë e Sektorit të Verifikimit. Sipas këtij akti, të dhënat dhe informacionet e grumbulluara në këtë proces trajtohen në përputhje me ligjin nr.138/2015, me Vendimin e Kuvendit nr. 17 datë 04.03.2016, si edhe me legjislacionin në fuqi për mbrojtjen e të dhënave personale.

Po ashtu, çdo person që hyn, transmeton, përdor ose përpunon të dhënat e sistemit elektronik në kundërshtim me rregullat teknike dhe legjislacionin në fuqi, ngarkohet sipas rastit me përgjegjësi administrative ose penale.